Али Байжұмат - Бағалай білмейміз біз барды

Бағалай білмейміз біз барды,
Әйтпесе, әр жанда бар арман.
Жігіттер, сүйіңдер қыздарды,
Қыз деген сол үшін жаралған.

Керек қой, әрине, білек те,
Жігітке ол артықтық етпейді.
Әйтсе де әңгіме жүректе,
Сезімге ешбір күш жетпейді.

Сезімді тұра алар бүгіп кім,
Жан ұғар жақынның жоқ теңі.
Ең ізгі ерлігі жігіттің —
Бір қызды бақытты еткені.

Бір рет қасірет шекпеген,
Бақыттың бағасын ұқпайды.
Бір қызды бақытты етпеген,
Жігіттен ерлік те шықпайды.

Мойында, жалтарма, шегінбе,
Азамат атанғың келсе егер.
Адамдық дегенің тегінде
Адамды сүюмен өлшенер.

Орды да, торды аңдамай,
Қанша қыз қайғыдан езілді.
Қорламай, арбамай, алдамай,
Сыйлаңдар оларға сезімді.

Аяла, еркелет, аймала,
Жанының жарасын жазып бер.
Болсыншы бақытты қайда да,
Болмысы гүл тектес нәзіктер.

Бәріміз зәруміз бақытқа,
Болғанмен әрқилы түсінік.
Қазіргі қатігез уақытта,
Адамды аяу да — кісілік!

Онсыз да бұл заман ызғарлы,
Күйреуде күнәсіз сан арман.
Сүйіңдер, сүйеңдер қыздарды,
Қыз деген сол үшін жаралған.