Behruz (Gr Yagzon) - Alloh uchun kechiring meni (Nashida)

Chiqmay turib tanamdan bu jon
Bo'lmay turib ranjigan inson
Uzr aytay borida imkon
Alloh uchun kechiring meni

Kimni nohaq, kimni haq dedim
Kimni bilmay haqqini yedim
Yoshlikda ko'p g'aflatda edim
Alloh uchun kechiring meni

Go'yo botqoqqa botgan misol
Gunohlarga botib ketgandim
Qilar ishim emasdi halol
Qalbi toshdek qotib ketgandim

Xarom bo'lgan hirslarni qo'shib
Sevgi deya qo'shiqlar aytdim
Alloh o'zi kechirsin meni
Bu noto'g'ri yo'limdan qaytdim

Gunoh meni olgandi qurshab
Sharob ichdim hayvonga o'xshab
Nima topdim bundayin yashab
Alloh o'zi kechirsin meni

Yolg'on so'zlab kimlarga yoqdim
Nomahramga xilvatlar boqdim
Zalolatning eshigin qoqdim
Alloh o'zi kechirsin meni

Tanish bilish meni bilganlar
Ozorimga sabab qilganlar
BEHRUZ deya bag'rin tilganlar
Alloh uchun kechiring meni

Men kechirdim kim etsa zulm
Hatto urib olsa ham kulim
Robbim desin jannatiy qulim
Alloh uchun kechiring meni

Vaqtincha bir amal tekkanda
Kim noiloj boshin egganda
Ranjitganman og'ir tekkanda
Alloh uchun kechiring meni

Qolgan umrim o'tsin zikrda
Ibodatda, har on shukurda
Bo'lmasangiz yomon fikrda
Alloh uchun kechiring meni

Haqqingizga duolar qilay
Ikki dunyo rohatin tilay
Ursangiz ham qo'lingiz silay
Alloh uchun kechiring meni

Kimga tashvish, kimlarga g'amman
Yarim tunda ko'zlari namman
Bir xokisor oddiy odamman
Alloh uchun kechiring meni

Kim kechmasa haqqini olsin
Ko'rgan kunin boshimga solsin
Gunohim shu dunyoda qolsin
Alloh uchun kechiring meni

Vasiyatim demang oddiy she'r
Behruzni ham yutar bir kun yer
Qiyomat kun demang haqqim ber
Alloh uchun kechiring meni

Kechiraylik bir-birimizni
Go'zal qilib xotimamizni
Jannatlarda jamlasin bizni
ALLOH O'ZI KECHIRSIN BIZNI